काठमाडौं । नेपाल दूरसञ्चार कम्पनी लिमिटेडले आफ्ना सेयरधनीलाई आर्थिक वर्ष २०७५।७६ को मुनाफाबाट प्रति शेयर ४५ रुपियाँका दरले नगद लाभांश वितरण गर्ने भएको छ । कम्पनीको मंगलबार सम्पन्न १२औँ वार्षिक साधारण सभा उक्त प्रस्ताब पारित गरेको हो ।
साधारणसभाले कम्पनीको लेखा परीक्षणका लागि चार्टर्ड एकाउण्टेण्ट प्रकाश जंग थापा र अच्युतराज जोशीलाई लेखापरीक्षक नियुक्त गर्नुका साथै निजको पारिश्रमिक समेत पारित गरेको जनाएकोछ ।
कम्पनीले आर्थिक वर्ष २०७५÷७६ मा कर तथा गैरकरवापत सरकारी राजस्वमा ३३.३१ अर्ब रुपियाँ दाखिला गरेको साधारण सभामा जानकारी गराइएको छ ।
त्यस्तै, कम्पनीको भ्वाइस र डाटा सेवाको बजार हिस्सा क्रमशः ३.९३ र ४.७५ प्रतिशतले वृद्धि भई ५४.८३ र ४८.४१ प्रतिशत पुगेको पनि साधारण सभामा जानकारी गराइएकोछ । त्यस्तै कम्पनीले कुल राजस्व र नाफा क्रमशः रू. ४३.८४ अर्ब र रू. ९.७६ अर्ब कायम गर्न सफल भएको जानकारी दिनुभयो ।
साधारण सभाले पारित गरेको लाभांश रकम बुधबारदेखि एनएमबी बैङ्कमार्फत वितरण गर्ने ब्यवस्था गरेको जानकारी गराएको छ ।
