.jpeg)
काठमाडौँ । देशको आर्थिक विकासका लागि अपरिहार्य ग्रील तथा स्टीलजन्य व्यवसायको प्रवद्र्धन गर्नुपर्नेमा यसका सरोकारवालाहरुले जोड दिएका छन् ।
विभिन्न परियोजना र पूर्वाधार निर्माणसँग प्रत्यक्ष जोडिएको ग्रील तथा स्टीलजन्य व्यवसायको प्रवद्र्धन गर्न सकेमात्रै देशको आर्थिक विकासमा योगदान पुग्न सक्ने उनीहरुको भनाई थियो ।
ग्रील तथा स्टील व्यवसायी महासंघ नेपालको ३० औं स्थापना दिवसको अवसरमा राजधानीमा आयोजित कार्यक्रममा महासंघका अध्यक्ष ठुलोबाबु श्रेष्ठले पूर्वाधारको विकास नभएसम्म देशको आर्थिक विकास नहुने भन्दै ग्रील तथा स्टील उद्योगहरुको संरक्षण र प्रवद्र्धनका लागि सरकारको ध्यानाकर्षण गराउनुभयो ।
व्यवसायीहरुका तर्फबाट गर्नुपर्ने सुधारहरु तथा मापदण्ड पु¥याउँदा पनि नेपाल सरकारले व्यवसाय दर्ता गर्न आनकानी गर्न थालेपछि त्यसको कानुनी तथा व्यवहारीक उपचारको खोजि किन नगर्ने भन्दै प्रधानमन्त्री, सभामुख, अर्थमन्त्री, उद्योगमन्त्री, उर्जा तथा जलश्रोत मन्त्रीलगायतसँग भेटघाट गरि सात बुँदै ज्ञापन पत्र समेत बुझाएको बताउनुभयो ।
ग्रील तथा स्टील व्यवसाय हरेक हिसाबले जोखिमयुक्त व्यवसाय भएकोले कर्मचारीको दक्षताको आधारमा श्रम ऐन बमोजिम सेवा सुविधा सहितको कर्मचारी नियुक्ति, कम्पनी ऐन र नियम बमोजिम जीवन बीमा, म्यादि बीमा, स्वास्थ्य बीमा, मुल्यमा एकरुपता र अन्य आधरभुत कुरा, उत्पादनबाट हुने खुद मुनाफाबाट गर्नुपर्ने सामाजिक उत्तरदायीत्वलाई समेत संस्थागत गर्दै लैजाने विषयमा महासंघले सम्बन्धित सरकारी निकायसँगको सहकार्यमा कार्यक्रहरु बनाउने तथा यसैवर्ष मुल्य सुची प्रकाशन गरि आम व्यवसायीहरुको व्यवसायमा पु¥याउने कार्य भइरहेको बताउनुभयो ।
महासंघको नेतृत्व सफल हुनु भनेको आम व्यवसायी तथा संगठनका सबै पदाधिकारीहरु सफल हुनु भएको भन्दै यसलाई मनन गरेर सामुहिक नेतृत्वको विकास गर्ने तथा प्रभावशाली उत्तराधिकारी उत्पादन गर्ने कुरामा कहि कतै कुनै कसुर बाँकी नराख्ने प्रतिबद्धता उहाँले जाहेर गर्नुभयो ।
श्रम रोजगार तथा सामाजिक सुरक्षा मन्त्रीको सहयोगमा यो वर्षदेखि महासंघले नेपाल सरकार श्रम, रोजगार तथा सामाजिक सुरक्षा मन्त्रालय, राष्ट्रिय व्यवसायीक प्रशिक्षण प्रतिष्ठान समिति, राष्ट्रिय व्यवसायीक प्रशिक्षण प्रतिष्ठान सँगको सहकार्यमा हाम्रो व्यवसायलाई आवश्यकपर्ने बिभिन्न तालिमहरु सञ्चालन गर्ने सम्झौता समेत गरेको र त्यसका लागि कार्यक्रमको मोडल तयार गर्न महासंघबाट तोकिएका प्रतिनिधिहरुले विभिन्न विज्ञहरुसँग परामर्श गरिरहेको उहाँले बताउनुभयो ।
कार्यक्रममा महासंघका वरिष्ठ सल्लाहकार निरन्जनकुमार श्रेष्ठले आफ्नो मनतव्य राख्दै २०५० साल तिर ग्रील व्यवसायीहरु पनि एकजुट भएर आफ्नो हक अधिकारको लागि अगाडी बढ्नु पर्छ भन्ने उदेश्यका साथ गठन गरिएको सानो समुह आज महासंघको रुपमा स्थापित भएर यहाँ सम्म आई पुग्दा आफुलाई अत्यन्तै खुसी लाग्ने गरेको बताउनु भयो ।
कार्यक्रममा बोल्दै महासंघका निवर्तमान अध्यक्ष मोहन कटुवालले इकाई समिति देखि महासंघ सम्म कसले के गर्यो भनेर प्रश्नहरु गर्नु भन्दा पनि मिलेर अगाडी बढ्नु आजको आवश्यकता रहेको बताउनुभयो । ग्रील तथा स्टील व्यवसायीहरुलाई आम उपभोक्ताहरुले जति माया गर्नु भएको छ त्यति मात्रामा नेपाल सरकारले महत्वको साथ नहेरेकोले महासंघको विकासमा मात्र होइन आम व्यवसायीहरुको व्यवसायमा समेत प्रभाव परेको बताउनु भयो तथा महासंघसँग सहकार्य गर्न मन्त्री मार्फत ध्यानाकर्षण समेत गराउनुभयो ।
महासंघका महासचिव विवेकदास श्रेष्ठले लाखौं श्रमशक्तिलाई नेपालमै राखेर यो व्यवसायले देशलाई योगदान दिएकोले राज्यले पनि यो व्यवसायप्रति गम्भिर भएर सोच्नुपर्ने बेला आएको बताउनुभयो ।
श्रम रोजगार तथा सामाजिक सुरक्षा मन्त्री शरत सिंह भण्डारीले नेपाली श्रम बजारमा देखिएको अभाव, बेरोजगारीको हल्ला र युवाहरुको वैदेशिक पलायनतालाई रोक्न सरकारले डिजिटल प्लेटफर्म मार्फत अगाडी बढ्ने गरि श्रम संसार नामक एप सञ्चालनमा ल्याएको र निकट भविश्यमै यसलाई नागरिक एपसँग जोडेर आम नागरिकको हात हातमा पु¥याउने योजना रहेको बताउनुभयो ।
कामदार आवश्यक पर्ने उद्योग, कम्पनी र काम गर्न ईच्छुक कामदारहरुलाई एकै ठाउँमा जोडेर समस्याको समाधान निकाल्न मन्त्रालयले यस्ता धेरै महत्वपूर्ण योजनाहरु ल्याउन लागेको बताउँदै मन्त्री भण्डारीले रहरले विदेश जाने वा धेरै पैसा कमाउन विदेश जानेहरुलाई रोक्न नसकिने तर बाध्यात्मक अवस्थामा विदेशिनुपर्ने अवस्थाको अन्त्य गर्न सरकाले भरपुर प्रयास गरेको बताउनुभयो ।
महासंघका महासचिव विवेकदास श्रेष्ठले सञ्चालन गर्नुभएको कार्यक्रममा नेपाल सरकार श्रम, रोजगार तथा सामाजिक सुरक्षा मन्त्रालय, राष्ट्रिय व्यवसायीक प्रशिक्षण प्रतिष्ठान समिति, राष्ट्रिय व्यवसायीक प्रशिक्षण प्रतिष्ठानका कार्यकारी निर्देशक रमेश बखती, महासंघको वरिष्ठ सल्लाहकार निरन्जनकुमार श्रेष्ठ तथा महासंघ अन्तरगत रहेका प्रदेश समिति, महिला समिति, जिल्ला समिति, क्षेत्रीय समिति तथा इकाइ समितिका अध्यक्ष तथा पदाधिकारीहरुको आतिथ्यता रहेको थियो ।
