काठमाडौं । अर्थतन्त्र बलियो बनाउन र व्यापारघाटा कम गर्न गाँजा खेती उपयुक्त माध्यम भएको सरोकारवालाहरुले बताएका छन् ।
साप नेपालले राजधानीमा आयोजना गरेको “नेपालमा गाँजाखेतीको कानुनी प्रावधान तथा औद्योगिक र औषधिजन्य सम्भावना” विषयक अन्तरक्रिया कार्यक्रममा बोल्ने वक्ताहरुले गाँजा खेतीको उपयोगिता र अर्थतन्त्रमा दिन सक्ने योगदानलाई मध्यनजर गर्दै सरकारले गाँजा खेती नीति, नियमको मातहतमा वैधानिकता दिनुपर्ने बताए ।
नेपालका विभिन्न भागमा अहिले पनि अवैधानिक रूपमा औषधीय प्रयोजनका लागि गाँजा प्रयोग हुने गरेको भन्दै यसलाई कानुनी दायरामा ल्याई व्यावसायिक खेती गरी आर्थिक लाभ लिनुपर्नेमा उनीहरूको जोड थियो ।
अन्तर्राष्ट्रिय जगतमा ‘ग्रिन गोल्ड’ का नामले चर्चित गाँजाको खेती नेपालको आर्थिक समृद्धिका लागि पनि सम्भाव्यता खोज्नुपर्ने उनीहरूको भनाइ थियो । कार्यक्रममा पूर्वकानुनमन्त्री शेरबहादुर तामाङले नेपालको आर्थिक समृद्धिका लागि गाँजा महत्त्वपूर्ण रहेको भन्दै यसलाई वैधानिकता दिएर निश्चत क्षेत्र तोकेर स्थानीय सरकारको नियन्त्रण र नियमनमा रहने गरी स्थानीय कृषकहरूको अगुवाइमा यसको खेती गर्ने गरी व्यवस्था गर्नुपर्ने बताउनुभयो ।
साप नेपालका कार्यकारी निर्देशक नरेन्द्र जोशीले मुलुकको समृद्धिसँग जोडिएको गाँजा खेतीको सम्भाव्यता अध्ययन जरुरी भएको बताउनुभयो । सरकारले चालु आवको बजेट वक्तव्यमा औषधीय प्रयोजनका लागि गाँजा खेतीको सम्भाव्यता अध्ययन गरिने घोषणा पनि गरेको छ ।
अल्लो तथा ह्याम्प एसोसियसनका अध्यक्ष गणेस एडीले हाल विश्व बजारमा भाँङ्ग तथा अल्लोको पोशाक तथा सामाग्रिहरुको माग बढेको हुनाले सरकारले यसलाई वैधानिकता दिएको खण्डमा खर्बांै राजस्व संकलन हुनुको साथै रोजगारीको अवसर सिर्जना हुने बताउनुभयो । नेपाल फर्म व्यवसायी संघका अध्यक्ष ऋगेन्द्र गिरीले नेपालीहरु अझै पनि गाँजा, भाङ्गको महत्व बुझन नसकेर गरिब भएको बताउनुभयो । गाँजालाई पुन वैधानिकता दिएमा आर्थतन्त्रमा सुधार आउने उहाँले बताउनुभयो ।
कार्यक्रममा साप नेपालका अध्यक्ष गीता भट्टराई, कार्यक्रम संयोजक जनक कार्की, साप नेपालका अनुसन्धानकर्ता सन्तोष भण्डारीलगायतले गाँजा खेतीलाई सहज गर्न कानुन बनाएर उत्पादन गर्ने हो भने नेपालको अर्थतन्त्र बृद्धि गर्न ठूलो टेवा पुग्ने बताउनु भएको थियो ।
.jpeg)
