मङ्गलबार नेप्से ३०.७६ अंकले उकालो लागेर ३००२.०७ को विन्दुमा पुगेर अडिएको छ भने सेन्सेटिभ इण्डेक्स ३.६६ अङ्कले उकालो लागेर ५१८.५९ को विन्दुमा पुगेको छ । समग्रमा मङ्गलबारको नेप्से १.०३ प्रतिशत र सेन्सेटिभ इण्डेक्स पनि ०.७१ प्रतिशतले उकालो लागेको छ ।
जुन चार वर्षयताको उच्च विन्दु हो । यस अघि २०७८ भदौ १३ गते नेप्से ३०४४.८७ विन्दुमा पुगेर बन्द भएको थियो । त्यसपछि तलमाथि गरेको बजारले तीन हजारको विन्दु पार गर्न सकेको थिएन ।
परिसूचकसँगै कारोबार रकम पनि १८ अर्बमाथि नै सम्हालिएको छ । मङ्गलबार ३२१ कम्पनीको चार करोड १८ लाख आठ हजार ९६६ कित्ता सेयर एक लाख ५७ हजार ५२३ पटक खरिद बिव्रmी हुँदा १८ अर्ब ५२ करोड ९३ लाख २२ हजार ८८५ रुपियाँ बराबरको सेयर कारोबार भएको छ । पछिल्ला केही दिनयता कारोबार रकम पनि १६ अर्बमाथि रहेको छ ।
तेस्रो दिन हिमालयन डिष्टिलरी लिमिटेडको सर्वाधिक सेयर कारोबार भएको छ । कम्पनीको ६४ करोड ४१ लाख ३८ हजार २७५ रुपियाँ बराबरको सेयर कारोबार भएर सर्वाधिक सेयर कारोबार भएको छ ।
तेस्रो दिन कारोबारमा आएका १३ वटा उपसमूहमध्ये विकास बैङ्क, व्यापार र फाइनान्स बाहेक बाँकी उपसमूहको परिसूचक उकालो लागेको छ ।
अन्य उपसमूहको परिसूचक सर्वाधिक २.५८ प्रतिशतले उकालो लागेको छ भने लघुवित्त १.६९ प्रतिशत, बैङ्किङ १.३२ प्रतिशत, निर्जीवन बीमा १.१२ प्रतिशतले उकालो लागेको छ ।
औसत मूल्यबारे ध्यानाकर्षण
सेयर बजारमा देखिएको प्राविधिक गडबडीको घटनालाई लिएर लगानीकर्ताले नेप्सेको ध्यानाकर्षण गराएका छन् ।
नेपाल सेयर बजार लगानीकर्ता संघ र नेपाल स्टक एक्सचेञ्ज (नेप्से)बीच सोमबार सेयर बजारमा देखिएको प्राविधिक गडबडी र लगानीकर्ताको चासोबारे छलफल भएको छ ।
संघले साउन १२ गतेको १५ मिनेटको औसत मूल्यसम्बन्धी समस्या उठाउँदै सुधारका लागि ध्यानाकर्षण पत्र बुझाएको हो । नेप्सेले समस्यालाई गम्भीरतापूर्वक लिएर सुधारको प्रतिबद्धता जनाएको छ ।
संघका पदाधिकारीहरूले नेप्सेका प्रमुख कार्यकारी अधिकृत चुडामणी चापगाँईसँग भेट गर्दै साउन १२ गतेको १५ मिनेटको औसत मूल्यमा देखिएको गडबडीबारे ध्यानाकर्षण गराएका थिए । सो घटनाले सेयर बजारमा पारदर्शिता र लगानीकर्ताको विश्वासमा गम्भीर असर पारेको भन्दै संघले तत्काल सुधारका उपायहरू अपनाउन आग्रह गरेको थियो ।
संघका अध्यक्ष डा. केशव प्रसाद श्रेष्ठले नेप्से प्रमुखलाई औपचारिक ध्यानाकर्षण पत्रसमेत बुझाउँदै बजारको प्रविधिगत सुदृढीकरण र लगानीकर्ता हितको संरक्षणमा ठोस कदम चाल्न आग्रह गर्नुभएको थियो । उहाँले बजारमा देखिएको प्राविधिक कमजोरीको समाधानका लागि दीर्घकालीन नीति तथा पूर्वाधार सुधार आवश्यक भएको उल्लेख गर्नुभयो ।
नेप्से प्रमुख कार्यकारी अधिकृत चापगाँईले विषयप्रति संस्थागत रूपमा गम्भीरता देखाइएको र भविष्यमा यस्ता समस्या दोहोरिन नदिन आवश्यक सुधारहरू लागू गरिने प्रतिबद्धता व्यक्त गर्नुभयो ।
सोमबार सेयर बजारमा गणनामा प्राविधिक समस्या देखिएको भन्दै नेप्सेले क्षमायाचनासहित सच्याएको थियो । सोमबार सेयर बजार ७.१० अंक बढेको थियो ।
.jpeg)
